Hani dr scho gseit, dass i itz o z Märit ga? Auso nid aus hundskommune Chund, nenei, ganz hochoffizieu hingerem Schtang aus Verchöifer. Da schtuunisch itz, gäu, dass me da sone Grossvätu no für settigs cha bruuche. Wobi i muess säge, es isch nume fürnes einzigs Mau u zwar genau am 14. Juni. Isch dr ds Zwänzgi gheit? Genau, Froueschtreik. Itz chönntimer da e haubschtündegi Diskussion füehre öbs öppis eso bruucht. Aber erschtens hani ke Platz für das i däm Eggeli u zwöitens bini äuä nid dr Richtig wüu i gar ke Frou bi. Aber  itz zrügg ufe Märit. Ds Trini  het öppere gsuecht wüu ihrer Märitfroue schtreike u ds Grosi hets gseh im Feissbuk u täicht dä Üelu het doch Zyt u i ha gseit mira u täicht  a däm gseih me ja o chli dass es a aune Egge wurd fähle ohni d Froue. Ömu i ga itz da gärn echli ga Gmües verchoufe. Vilech hiuft das o no chli gäge ds schlächte Gwüsse. Wüu ehrlech gseit bini nümm ganz sicher öbi im 71i für das Froueschtimmrächt bi gsi.